Plattdeutsche Nachrichten Plattdüütsche Narichten vun'n 20. Dezember 2024

Bunnesraat entscheedt över Gesette

Berlin – In’n Bunnesraat geiht dat vundaag üm weniger Stüerlast för de Börger, den Schutz vun’t Bunnesverfatengericht un een högeren Bidrag to de Pleeg. Güstern harr de Bunnesdag all entscheden, dat dat Kinnergeld üm fief Euro kladdern schall. Ok de Pleegbidrag schall wegen de högeren Kosten nochmal anstiegen. Bremen maakt sik tohoop mit Neddersassen, Hamborg un Mecklenborg-Vorpommern darför stark, dat de Mietpreisbrems wieter bestahn blifft. Bitnu löppt se bit to’n Enn vun’t tokamen Johr ut.

Baerbock snackt in Ankara över de Laag över Syrien

Istanbul – Bunnesbutenministersche Baerbock is vundaag in de Türkei. In Ankara snackt se mit ehrn Amtskollegen Fidan över dat Ümstörten in Syrien. De Türkei hett de Finger mit in’t Speel bi de islamistische HTS. De Grupp hett na dat Störten vun’t Regime de Kuntrull övernahmen. To de glieke Tied ward aver ok bekrittelt, dat de Türkei mit Militär gegen de Kurden in Nordsyrien vörgeiht. Baerbock ward de Türkei darüm woll darto opropen, to de Stütt vun Syrien bitodrägen.

Snacken över de Tarife bi Volkswagen geiht wieter

Hannober – In’n Striet över de Tarife bi Volkswagen is wieter keen Eenigung in Sicht. Bit Middernacht hebbt dat Kunzernleit un de Arbeitnehmersiet verhannelt. Nu an’n Vörmiddag wüllt se wieter snacken. Ut Binnenkreisen geev dat to’n ersten Mal lüttje Henwies, dat se sik nöger kaamt. Kunzern un Gewarkschupp verhannelt in de fiefte Runn nu all siet Mondag över de Tokunft vun de dütschen VW-Steden un de Arbeiders. Wenn se sik nich eenigt, draut de Gewarkschupp mit nee’en Strieks to’n Wahrschaun.

Bremer Karken un Binnensenator eenigt sik över Karkenasyl

Bremen – Binnensenator Mäurer un Vertreder vun de evangelischen Karken sünd in’n Striet över dat Karkenasyl op een Brett kamen. Dat heet, de Binnenbehöörd will bit to’n Enn vun’n Januar keen Flüchtlinge afschieven, de nu in’t Karkenasyl sünd. Bit darhen wüllt se wieter snacken. Buterdem hebbt beid Sieten afmaakt, dat keen Minschen mehr ut annern Bunneslännern opnahmen ward.

ADAC rekent mit veel Verkehr düssen Dag

Bremen -  De ADAC rekent hüüt mit den mehrsten Verkehr an een Dag in’t heele Johr. Veele fohrt vundag all los in’n Wiehnachtsurlaub or fohrt noch gau in de Stadt, üm wat to kopen. Darüm sünd woll de Töög vull un dat kann ok för Problems op de Straten sorgen.

Dat Weer

Un nu een Blick op dat Weer: in Bremen un Deefholt 4, in Bremerhaben 5 un op Wangerooge sünd dat opstunns 8 Graad. Hüüt wesselt sik dicke Wulken un een beten Sünn af. Darto treckt Regenschuers dör, Richt Emsland ward dat an’n Namiddag meist dröög – bi 6 bit 8 Graad. Tokamen Nacht is de Heben meist gries un wulkig, man faken dröög. Later gifft dat af un an aver Regen or Sprütteregen. Dat Thermometer sackt to’n Beginn vun de Nacht op 6 bit 3 Graad. Achterna kladdert de Temperaturen wedder na baben. Morrn sünd wieter veele Wulken to sehn, de Sünn wiest sik blots kort mal. Darto fallt erstmal blots af un an een beten Regen. An’n Namiddag pladdert dat denn mehr, bi 7 bit 9 Graad. Dat weern de Narichten op Platt. Irene Lottes hett se tohoopstellt. Op platt trechtmaakt un vörleest hett se Heidi Jürgens.