Plattdeutsche Nachrichten Plattdüütsche Narichten vun'n 17. Dezember 2024

Parteien stellt Wahlprogramme vör

Berlin: Wo Bunnskanzler Olaf Scholz güstern dat Afstimmen över de Vertroensfraag verloren hett, dreiht sik nu allens um den Wahlkampf för den Bunnsdag. SPD, Gröne un de Union stellt vundaag jümehr Wahlprogramme vör. CDU un CSU wüllt de Wirtschap mehr Stütt geven un de Stüern daalsetten. De Grönen verlangt en Klimageld as Utgliek dorför, dat Energie dürer un dürer warrt. De Sozialdemokraten nehmt sik vör, en Barg Geld schall in de Infrastruktur rin.

Düütschland-Ticket: Geld för 2025 is dor

Berlin: SPD, Gröne un de Union hebbt fastleggt, woans se dat Düütschlandticket tokamen Johr betahlen wüllt. Dat hebbt de Sprekers vun de Frakschonen güstern Avend anseggt. Dorför mutt dat Regionaliserungsgesetz ännert warrn. De Frakschonen seggt: Dat will de Bunnsdag noch düsse Week kloormaken, un achteran ok de Bunnsraat. Dat Düütschlandticket köst tokamen Johr 58 Euro den Maand.

Wisconsin: Schooldeern schütt twee Minschen doot

Madison: An en School in den US-Bunnsstaat Wisconsin sünd twee Minschen dootschaten un noch soss verletzt worrn. De Polizei seggt: Maakt hett dat en Schooldeern vun 15 Johr. Dootschaten hett se en Schöler un en Schoolmester. Bi twee Lüüd, de anschaten worrn sünd, geiht dat noch um Leven un Dood. De Deern hett sik achteran sülvst ok dootmaakt. Wat dor achter stickt, weet se noch nich.

Bremer Behörden: Mehr un mehr Wirtschaps-Kriminalität

Bremen: Straafdelikten in de Wirtschap warrt in’t Land Bremen mehr un mehr. Dor höört ok Bedregeree mit to, ok de Enkel-Dreih. Dat hett de Lannsregerung künnig maakt. De Senat seggt: Verleden Johr hebbt se mehr as 1400 so’n Saken tellt. Dat sünd meist dubbelt so vele as noch veer Johr vörher. De Schaden liggt bi mehr as teihn Millionen Euro.

Bremerhaven: Düt Johr hunnert mal Karkenasyl

Bremerhaven: Düt Johr hebbt um un bi hunnert Minschen Karkenasyl kregen. De tostännigen Karkengemeenden in de Stadt hebbt to buten un binnen seggt: Ja, dat is wohr. Gegen 2023 sünd dat also noch mal wedder mehr worrn. Normal kruupt de Minschen för en Halfjohrstiet bi de Kark unner. Se luert dorop, dat se ehr Saak in Düütschland verhannelt warrt, un se wüllt nich ut Düütschland rut. In’t ganze Land Bremen hebbt se sowat 200 mal Karkenasyl tellt – vergleken mit anner Länner is dat veel.

Dat Weer

Un woans süht dat mit dat Weer umto ut? Opstunns hebbt wi in Bremerhaven 8 Graad, in Bremen, Cloppenborg un Nienborg sünd dat 9 Graad. Vundaag geiht dat wieder mit dat griesgrimmelige Dezemberweer. Richtig hell warrt dat nich. Dat kann ok mal drüppeln, man normal blifft dat dröög. Dat Thermometer blifft bi 8 bet 9 Graad. De Wind dorto weiht in Maten, an de See ok frisch un mit deegte Böen vun de süüdwesten Kant, gegen Avend warrt de Wind weniger. Tokamen Nacht: Eerst noch vele Wulken, de köönt aver oplockern. Meist överall dröög. Na Middernacht kaamt vun Westen her wedder mehr Wulken rin, un an’n Morgen fangt dat dor ok an to pladdern. Bi 8 bet 5 Graad. Morgen: Vun de Ems her treckt Regen över dat Bremen-Een-Land weg. Gegen Middag kriegt wi ok mal en drögen Törn, un dat kann ok mal heller warrn. An’n Namiddag kummt aver mehr Regen vun de See rin. Bi warme 11 bet 13 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Michael Kück.