Plattdeutsche Nachrichten Plattdüütsche Narichten vun'n 9. Dezember 2024

Guterres heet Fall vun Assad-Regim goot

Nee York: Mit den Fall vun Syriens Diktater Baschar al-Assad befaat sik hüüt ok de Weltsekerheitsraat. Russland hett na Angaav vun Diplomaten en Ielsitten beandraagt. UN-Generalsekretär Guterres heet den Fall vun Assad goot. Dat syrsche Volk hett nu en histoorsche Mööglichkeit för en seker un freedlich Tokunft. De islamistisch HTS-Miliz un ehre Anhängers harrn güstern de syrsche Hööftstadt Damaskus innahmen.

Unions-Kanzlerkandidaat Merz besöcht Ukraine

Kiew: Unions-Kanzlerkandidaat Friedrich Merz is to en nich ankünnigt Besöök in de Ukraine indrapen. De CDU-Politiker keem hüüt morgen mit en Sünnertog in de Hööftstadt Kiew an. Dor will he ünner annern Präsident Wolodymyr Selensky drepen. As he ankeem se Merz, dat warrt dorüm gahn, wat Düütschland maken künnt, üm dat tweie Land bi dat verdeffenderen gegen russche Aggressioon to hölpen. Dat is de tweete Besöök vun Merz in de Ukraine siet Russland den Krieg anfungen hett.

VW-Arbeiders schüllt wedder op de Straat gahn

Wolfsborg: Bi den Autoboer Volkswagen schall dat wedder en grooten Wohrschaustreik geven. Gliektietdig to de veerten Tarifrunn röppt de IG-Metall hüüt in binah allen düütschen VW-Standoorten dorto op, de Arbeit mitünner rohen to laaten. VW stickt böös in de Kris un will en strengen Spoorkurs fohren, man ok Dichtmaken vun Warken is nich vun´n Disch. De Gewarkschop verlangt dat all VW-Steeden blieven un dat all de rund 130.000 Arbeiters wieder arbeiden dröfft.

Bremer Straatenbahn AG verschuuvt „Anbottsoffensiv“

Bremen: . Dat Mobilitätsressort verschuuft de „Anbottsoffensiv“ för de Bremer Straatenbahn AG üm binah een Johr. Eegens weer plaant, dat vun März af an all Bussen un Bahnen vun de BSAG all neeslang fohrt. Fohrgäst künnt to Spitzentieden den jümmer all söveneenhalf Minuten in en Bus or Stratenbahn stiegen. Dorför fehlt Bremen aver dat Geld. Dorüm warrt de Plan op Anfang 2026 rutschuuvt, see en Behördenspreker.

Ordeel to den neddersässchen Landdagswahl 2022 fallt

Bückeborg: De Neddersässche Staatsgerichtshof maakt an Vörmiddag künnig, of de Landdagswahl vör twee Johren gellt or nich. Twee FDP-Liddmaaten harrn sik beklaagt un smiet de AfD Unregelmatigkeiten bi dat Opstellen vun ehre Landslist för. Wat bi dat Ordeel vun den Staatsgerichtshoff rutsuert künnt dorto föhren, dat de Wahl wedderhaalt warrt.

Dat Weer

Un nu kiekt wi op dat Weer: In Bremen un Möppen hebbt wi fief Graad, in Bremerhoben un Emm sünd dat opstunns söss Graad. Hüüt seht wi meist Wulken an Heven un dat pladdert jümmer mal wedder. An de Küst is dat ehrder mal dröög, man de Sünn is dor ok nich to sehen. Dat Thermometer wiest us fief bet söven Graad. In de Nacht wiederhen veel Wulken un dat warrt daakig, eerst noch Spütterregen laater denn dröög bi fief Graad op de Eilannen un Bremen un twuschen Övelgönne un Gnarrenborg veer Graad. Morgen wedder Wulken un hoogen Daak in´t süüdliche Binnenland meist Spütterregen, anners blifft dat dröög. In´t nöördlichen Binnenland un an de Küst schafft de Sünn dat mal ganz kort dör de Wulken to kieken, dat Ganze bi fief bet söss Graad.

Dat weren de Plattdüütschen Narichten. Tohoopstellt vun Anja Guse. Op platt torechtmaakt un vörleest vun Martina Brünjes.