Plattdeutsche Nachrichten Plattdüütsche Narichten vun'n 13. Dezember 2024

Dör hoge Meden leevt mehr Minschen in Armot

Bremen: Dör hoge Wahnkosten leevt in Düütschland düütlich mehr Minschen in Armot as betnu annahmen. Dat steiht in en Studie vun den Paritäätsch Wollfohrtsverband. Rekent man mit, wo veel Inkamen överblifft, achterna de Meed aftrocken wurr, sünd rund fief Millioon mehr Minschen arm, as betnu vermood, maakt de Verband künnig. In Bremen gifft dat na den bunnswieden Vergliek den hööchsten Stand an Wahnarmot.

Tafeln hebbt wassen Problemen

Berlin: Jümmer mehr Tafel hebbt Problemen, Minschen mit Levensmiddeln to versorgen. Vunwegen sik jümmer mehr Mischen de dat nödig hebbt an de Tafeln wennen, mööt düsse de utgeven Levensmiddel jümmer starker ratschoneren. Meist de Hälft vun all Tafeln in Düütschland sünd bedrapen, mellt de „Nee´e Ossenbrügger Zeitung“ un beröppt sik op den Dackverband. Dorna is de Tahl vun Minschen de sik an de Tafel wennt, siet de Krieg in de Ukraine anfungen hett, üm de Hälft anstegen.

Bund un Länner stellt Digitaalpakt 2 vör

Berlin: Bund un Länner wüllt hüüt de Eckpunkten för den Digitalpakt 2 vörstellen. Över dat Programm kriegen de Schoolen Geld, üm to´n Bispeel Laptops or digitale Tafeln to köpen or Wiederbillen to finanzeren. Siet Mai wurr verhannelt – hauptsaak över de Fraag, wer de Digitaliserung an Schoolen betahlt. In Tokunft schüllt sik Bund un Länner de Kosten delen.

Dokters an neddersässchen Krankenhüüs streiken

Hannober: An rund 40 kommunalen Krankenhüüs in Neddersassen wüllt de Dokters hüüt den ganzen Dag streiken. Dat schall aver Nootdeensten geven. Bedrapen sünd ünner annern dat Klinikum Ollenborg un de Aller-Werser-Klinik in Veern un Achem. Dor achter stickt Tarifverhanneln.

Junge Mudder starvt bi en Unfall in de Wersermarsch

Brake: Bi en slimmen Verkehrsunfall op de B211 in Ovelgönne is güstern en Froo doot blieven. De 34-johrige ut Brake weer in en Bögde in den Gegenverkehr kamen, liekto mit en anner Wagen tosamenstött un den gegen en Laster sleudert. En 57-johrige Mitfohrersche is op Leven un Dood to Schaden kamen – dat dree Weken oolt Lüttkind vun de Fohrersche wurr swoor versehrt. De Bunnsstraat weer bet in de Nacht dicht.

Dat Weer

Un nu kiekt wi op dat Weer: In Bremen, Bremerhoben un Deefholt hebbt wi twee Graad, in Emm sünd dat opstunns dree Graad. Hüüt fangt de Dag mit velen Wulken un meist gries aver dröög an. Övern Namiddag schafft de Sünn dat in süüden vun Neddersassen mal an de Wulken vörbi un dat bi twee bet veer Graad in´t Binnenland un op de Eilannen. In de Nacht warrn de Wulken eerst weniger, laater maakt de sik aver wedder breed an Heven, man dat blifft dröög bi twee Graad op de Eilannen un null bet minus twee Graad in´t Binnenland. Morgen fangt de Dag mit nich so velen Wulken an, laater aver veel Wulken de vun de Nordsee un de Nedderlannen ok Regen bringen. Dat Thermometer wiest us dree bet söss Graad. Sünndag wiederhen veel Wulken, hier un dor weniger Wulken, dat blifft över länger Tiet dröög bi söss bet acht Graad.

Dat weren de Plattdüütschen Narichten. Tohoopstellt vun Irene Lottes. Op platt torechtmaakt un vörleest vun Martina Brünjes.