Plattdeutsche Nachrichten Plattdüütsche Narichten vun'n 11. Dezember 2024

Bunnskanzler Scholz stellt den Andrag för Vetroensfraag

Berlin. Bunnskanzler Olaf Scholz will vundag bi de Bunnsdagspräsidentsche Bärbel Bas den Andrag stellen, dormit he an´n tokamen Mondag de Vetroensfraag stellen kann. Dat is de eerste Schritt to en Neewahl vun den Bunnsdag. De Neewahl schall dat an´n 23. Februar geven. Dat gellt as seker, dat de Bunnsdag Scholz bi de Afstimmen an´n Mondag nich dat Vetroen utspreken warrt. Scholz blifft denn in´t Amt un föhrt de Geschäfte eerst mal wieder. Siet dat Ut vun de Ampel-Regerung föhrt Scholz en Regerung vun SPD un Grönen, de nich mehr de mehrsten Stimmen in´t Parlament hett.

Scholz un Erdogan snacken över Laag in Syrien

Berlin. Bunnskanzler Olaf Scholz hett an´n Avend mit den törschen Präsidenten Recep Tayyip Erdogan telefoneert. Se hebbt över de Laag in Syrien snackt. Beide sünd övereens kamen, dat de Fall vun den Assad-Machtapparaat en bannig goden Verloop nehmen deit. Dat see Regerungsspreker Steffen Hebestreit. Nu mööt dat darüm gahn, dat Syrien en sekere Heimat för all Syrer warrt. Ok EU-Kommischonspräsidentsche Ursula von der Leyen hett an´n Avend mit Erdogan telefoneert. Se hett ankünnigt, Anfang tokamend Week to Drapen in de Törkei to fohren.

Börgerschaft will över Karkenasyl snacken

Bremen. De Bremsche Börgerschaft will an´n Middag ünner annern över dat Karkenasyl snacken. De FDP hett dorto en Aktuell Stünn beandragt. Achtergrund is dat Afschuven vun en jungen Somalier na Finnland, dat nich klappt hett. De FDP in Bremen will weten, wo de Senat in´n Groten un Ganzen to Karkenasyl steiht. Un wo he dat Gewaltmonopol in Staatshand dörsetten will. Binnensenator Ulrich Mäurer hett de Bremsche Evangelische Kark vörsmieten, sick nich an Afspraken to hollen.

Lüüd ahn Ünnerdack in Bremen könen in Tokunft in fröher Bremer Danzlokaal slapen

Bremen. Üm Lüüd, de Drogen to´n Överleven brukt un keen Dack över´n Kopp hebbt en Steed to´n Slapen to geven, hett de Drogenhülp-Dreger Comeback in´n Opdrag vun de Gesundheitsbehöörd Rüüm an´n Rembertiring anmeden. Dat hannelt sick üm dat Parterr vun dat fröher Danzlokaal Stubu. Op en Flach vun rund 300 Quadratmeters weern in de tokamen Weken op Tiet Slaap- un Steden to´n Ophollen för Lüüd, de ahn Drogen nich torechtkamen inricht.

Pleegheim in Wils sett sick för Ophoolverlööf vun ehr kubanisch Pleeghölper in

Rodenborg. Vertreder vun en Heim för Demenzkranke in Wils in´n Kreis Rodenborg wüllt an´n Mondag en Petitschoon an den Bunnsgesundheitsminister Karl Lauterbach övergeven. Dorbinnen verlangen se, dat thein kubanisch Pleeghölper vun dat Heim en Ophooltitel kriegen. De Asylandrääg vun de Kolumbianer weern aflehnt wurren. Dorüm mööt se nu utreisen, liekers se all en gellen Arbeitsverlööf hebbt.

Dat Weer

Un nu noch en Blick op dat Weer: In Demorst fief, in Bremen-Mitt dree, in Bremerhaben twee un in Ollenborg sünd dat opstunns dree Graad. Vundag treckt en smalen Wulken-Striepen vun de Küst över Bremen bit to´n Ollenborger Münsterland, Ossenbrügger Land un Steinhuder Meer, wo dat en poor Löcker in de Wulken gift. Hier un dor kann sogor de Sünn dör de Löcker kieken. Vun de Nordsee kamen gau dichte Wulken, so dat dat an´n Namiddag en beten Natt vun baven kaamt. De Wind weiht eerstmal en beten vun överall. An´n Namiddag weiht de Wind vun de Westen bit Süüdwesten Kant in Maten. Dat Thermometer wiest dree bit söven Graad. In de Nacht sünd vele Wulken an´n Heven. Hier un dor kann dat Spütterregen geven. De Temperaturen liggen bi een bit fief Graad. Morn is dat gries. Man dat blifft dröög. Hier un dor kann dat mal en beten Spütterregen geven. Dree bit söss Graad stahn denn op dat Thermometer. Dat weern de Narichten op platt. Tohoopstellt hett se Katrin Martens. Op Platt trechtmaakt un vörleest vun Markus Weise.