Plattdeutsche Nachrichten Plattdüütsche Narichten vun'n 6. Dezember 2024

Froenslüüd schüllt Rechtsanspröök op Schutz vör Gewalt kriegen

Berlin: De Bunnsdag snackt hüüt över mehrere Andrääg to dat Gegenangahn vun Gewalt gegen Froenslüüd. Dorünner is ok dat Gewalthölpgesett, dat SPD un de Grönen vörleggt hebbt. Mit dat Gesett schüllt Froenslüüd Rechtsanspröök op Schutz un Beraden kriegen. Plaant is, datt bet 2030 Froenhüüs, Schutzwahnungen un Steden to’n Beraden utboet ward. Union un FDP hebbt egen Vörslääg för Gesetten vörleggt.

Macron will nee’en Regerungsböversten opstellen

Paris: Frankrieks Präsident Macron hett utslaten, datt he sien Hoot nimmt, nadat sien Regeern nich mehr dat Leit hett. In en Fernseh-Anspraak hett Macron kloorstellt, datt he bet 2027 Präsident blieven will. In de tokamen Daag al will he en nee’en Regerungsböversten opstellen.

Gewarkschaft vun de Dokters kämpft för högeren Lohn

Bremen: De Gewarkschaft vun de Dokters Marborger Bund hett Mediziners in mehrere Bunnslänner to Laway opropen. Dorachter stickt dat Tarifverhanneln, dat still steiht. Dat geiht ok üm de kommunalen Krankenhüüs in’t Land Bremen. Vun Klock 12 an findt en so nöömte „aktive Middagspaus“ vör dat Klinikum Bremen-Mitt statt. Se schall veer Stünnen anduern. Na Utkunft vun’n Klinikverbund Geno mööt Patschenten in düsse Tiet dormit reken, datt nich allens rund löppt.

Högere Temperaturen wegen weniger deephangen Wulken

Bremerhaben: Forschers vun dat Alfred-Wegener-Institut hebbt womööglich en Verkloren funnen, woso in’t verleden Johr op de heelen Welt de Temperaturen so besünners hooch gahn sünd. Dat liggt woll doran, datt dat weniger Wulken in leeger Hööchde geev, as Satelittenopnahmen wiest hebbt. Düsse deephangen Wulkenschicht wirkt as en Oort Schutzschild gegen de starken Sünnstrahlen un köhlt de Eer. Wat nipp un nau dorto föhrt hett, is na Utkunft vun de Forschers betto noch nich kloor.

Polizei wohrschaut vör gefährliche Mannslüüd

Bremen: De Polizei söcht na twee Mannslüüd, de ut de Maatregelhaft in Bremen-Oost utneiht sünd. Se sünd al siet Deensdag op de Flucht, as de Polizei vermellt. De Mannslüüd vun 24 un 28 Johr sünd vör Gewalt nich bang un krank an Kopp un Seel. Een schall se nich to nah kamen, seggt de Polizei. Fotos un wietere Informatschonen wo se utseht gifft dat in’t Internet bi butenunbinnen.de.

Dat Weer

Un nu en Blick op dat Weer: In Bremen un Bremerhaben 7, op Borkum 8, un in Leer sünd dat opstünns 9 Graad. Hüüt fallt ut meist dichte Wulken vun Tiet to Tiet Regen, oder Schuers treckt dör. Den mehrsten Regen gifft dat in’t süüdliche Emsland. An’n Namiddag un Avend blifft dat fakener dröög, un dat kann ok af un an oplockern. De Temperaturen liggt bi 7 bet 10 Graad. In de Nacht hollt sik veele Wulken un dat lockert blots af un an op. Dor fallt ok mal’n beten Regen oder lichte Schuers, aver dat blifft ok mal för längere Tiet dröög. To’n Morgen hen gifft dat ut de Nedderlannen wedder mehr Regen bi 6 bet 4 Graad. Morgen treckt vun’t Emsland vun West na Oost Regen dör. Darna blifft dat an’n Namiddag fakener dröög, af un an lockert dat op. Dat ward lau mit 8 bet 11 Graad. An’n Sünndag veele Wulken, af un an Sünnschien un meisttiets dröög bi 5 bet 7 Graad.

Dat weern de Narichten op platt. Tohoopstellt hett se Sven Kuhnen. Op Platt trechtmaakt un vörleest vun Marc Gelhart.