Plattdeutsche Nachrichten Plattdüütsche Narichten vun'n 5. Dezember 2024

Frankriek bruukt een nee’e Regeern

Paris – Frankrieks Premierminister Barnier is dör een Misstroonsandrag afsetzt worrn. In de Natschonalversammeln hett de Andrag vun de linke Oppositschon een dütliche Mehrheit kregen. Darachter stickt een Striet över den Huusholt un den Spoorkurs, den Barnier foddert hett. Präsident Macron mutt nu to’n tweeten Mal dütt Johr een nee’en Premierminister söken. De Oppositschon seggt, dat liggt an em, dat allens in Legerwall kamen is un foddert, dat Macron sien Hoot nimmt.

Bunnesraat hollt Raat över dat Afdrieven un Organspennen

Berlin – In’n Bunnesdag geiht dat hüüt üm dat Recht op Afdrieven in de ersten twolf Weeken. Bunnesfamilienministersche Paus hoopt op breede Ünnerstützung för dat Ännern vun’n Paragrafen 218. Buterdem snackt de Afordneten över een Vörslag för een Regeln to‘n Inspruch bi Organspennen. Darna schall in’n Groden un Ganzen jeder as Organspenner gellen, de nich klaar un dütlich Inspruch inleggt.

Merkel as letzte Tüüg in’n Ünnersökensutschuss

Berlin – In‘n Afghanistan-Ünnersökensutschuss vun’n Bunnesdag geiht hüüt dat Befragen vun de Tüüg to Enn. To’n Afsluss sünd Altkanzlersche Merkel un de damalig Kanzleramtsbaas Braun dran. De Ünnersökensutschuss schall de Ümstänne vun dat Aftrecken vun de Bunneswehr 2021 opklären. Dat geiht ok darüm, of de Ämters de Laag vun de Sekerheit nich richtig inschätzt hebbt.

Bremer Polizeibeopdragte präsenteert ersten Bericht

Bremen – De Bremer Polizeibeopdragte Riedel präsenteert hüüt Middag ehrn ersten Bericht. Se hett dat nee’e Amt vör rund tweeenhalf Johren övernahmen. De Polizeibeopdragte is bi de Bremsche Börgerschupp ansiedelt un schall för de Polizei as ok för de Börger to’n Snacken över Probleems dar sien. Riedel harr all ankünnigt, över een paar Strietthemen wat to vertellen, to’n Bispill dat minnachtig ankieken vun Minschen.

Borkumer wüllt Klaasohm ahn Gewalt fiern

Borkum – Tokamen Nacht fiert de Borkumer ehr traditschonellet Klaasohm-Fest. De Bruuk weer dütschlandwiet bekrittelt worrn, wiel darbi Froons mit een Kohhoorn slaan worrn sünd. De Veranstalter verspreekt nu, dat ward nich mehr passeern. De Fier schall stattfinnen, man ahn Klopperee. De Polizei Leer/Emden hett vörsichtshalver noch mehr Personal op dat Eiland schickt.

Dat Weer

Un nu een Blick op dat Weer: in Bremen 2, in Bremerhaben un Deefholt 3 un op Wangerooge sünd dat opstunns 4 Graad. De Dag fangt mit lockeren Wulken an, man gau treckt dat to un vun’t Emsland her kummt Regen op. To’n Abend hen ward dat denn wedder kort mal dröög, man de Heben blifft gries – bi 5 bit 7 Graad. Tokamen Nacht hollt sik de Wulken un vun Westen her kummt mehr un mehr Regen op. Dat ward milder, bi 6 bit 8 Graad. Morrn pladdert dat af un an ut dicken Wulken. An’n Namiddag un Abend kann dat ok mal een beten oprieten, bi 8 bit 10 Graad. Sünnabend veele Wulken, Schuers treckt dör vun West na Oost bi 8 bit 10 Graad. Darto weiht een frischen Wind. Dat weern de Narichten op Platt. Irene Lottes hett se tohoopstellt. Op platt trechtmaakt un vörleest hett se Heidi Jürgens.