Plattdeutsche Nachrichten Plattdüütsche Narichten vun'n 07. Oktober 2026

Ryanair stellt Floogbedriev vun Bremen ut in

Bremen: Ryanair stellt den Floogbedriev in'n April tokamen Johr vun Bremen ut in. Dat hett de Weertschopsbehöörd buten un binnen künnig maakt. Wat dor achter stickt hett de Floogsellschop nicht seggt. Na de Weertschopsbehöörd wurr toletzt över de Höögde de Afgaven verhannelt. Dat Ut vun Ryanair bedütt för den Flegerhaven 400.000 Flooggäst minner per Johr un meist dree Millioon Euro Verlust.

Merz denkt de Offers vun Terrorattack de Hamas op Israel

Tel Aviv: Nip un Nau dree Johren achterna de Attack de Hamas op Israel denkt de ganzen Welt hüüt an de Offers. De zentrale Gedenkfier finnt hüüt Avend in Tel Aviv statt. Bunnskanzler Friedrich Merz see, he hööpt, dat de deepe Quaal un de Wunnen helen köönt. De israelschen Frünnen künnt op den düütschen Insatz tellen, dormit sik so en Verbreken nich wedderhaalt.

Bunnsregeern snackt över Reformkurs

Berlin: To’n eersten Mal siet meist dree Manden kaamt an‘n Avend de Baversten vun CDU/CSU un SPD to en Sitten vun den Koalitschoonsutschuss tohoop. Snackt warrt över den wiederen Reformkurs, man mit konkrete Beslüss to striedig Vörhebben warrt nich rekent. SPD-Fraktschoonsbaas Matthias Miersch see ehrder düt Sitten, he rekent mit en oprecht Utspraak doröver, wo man de Opgaven in den tokamen Manden angeiht.

Gericht gifft Bremer Linke in den Striet mit FDP recht

Bremen: In den Striet twuschen de Bremer Linken un de FDP hett dat Bremer Landsgericht den Linken Recht geven. Dorna draff de Bremer FDP in Tokunft nich mehr postuleren, de Fraktschoonsböverste Sofia Leonidakis hett op en Wahlfier in Berlin „mit Antisemiten, mit Terroristen un mit Clankriminalität“ fiert. Dat hett de FDP-Fraktschoonsbaas Thore Schäck op en Sitten de Bremschen Börgerschop seggt. Leonidakis see, dat se nienich op de nöömte Fier wesen weer.

Neddersassen plaant Gesett gegen düer Ploogland

Hannober: Ploogland schall för Buern-Familienbedrieve in Neddersassen to betahlen blieven – dorop is en Gesettvörhebben vun Landweertschopsministersche Miriam Staudte utleggt. So köönt denn woll ok Kooppriesen, de mehr as 35 Perzent över den normalen Weert liggt, in Tokunft kontrolleert un ok de Verkoop stoppt warrn. Na Angaav de Grönen in den Landdag hett sik de dörchsnittlich Hekterpries siet 2004 verdreefacht.

Dat Weer

Un nu kiekt wi op dat Weer: In Rottenborg un Rasteed hebbt wi darteihn Graad, in Bremen veerteihn Graad un in Bremerhoben sünd dat opstunns sössteihn Graad. Hüüt fangt de Dag diesig un daakig an aver mehr un mehr lacht denn de Sünn. Blots an de Küst sünd noch länger Wulken. An'n Avend kaamt de Wulken vun de Ems her in’t Land un dat bi twintig bet een-un-twintig Graad. In de Nacht warrt de Wulken mehr, na Middernacht fangt dat an to dröppeln bi veerteihn bet twolf Graad. Donnersdag fangt mit Wulken un Regen an, vun Namiddag af an treckt de Wulken över de Werser af un vun de Nordsee her wesseln sik den Wulken un Sünn af, liekers kann dat schuern, an de Küst ok mit Gewidder bi veerteihn bet sössteihn Graad.

Dat weren de Plattdüütschen Narichten. Tohoopstellt vun Daniel Haselbach. Op platt torechtmaakt un vörleest vun Martina Brünjes.