Plattdeutsche Nachrichten Plattdüütsche Narichten vun'n 2. Oktober 2026

Dag vun de Düütschen Einheit in Bremen

Bremen: In de Binnenstadt fangt an’n Namiddag dat Börgerfest to’n Dag vun de Düütschen Einheit an. Op’n Marktplatz, an de Slacht, an’n Oosterdiek un an’t Werserstadion gifft dat veele Stännen un Bühnen. Bet Sünndagavend ward mit meist 450.000 Besökers rekent. För de Sekerheit ward bannig veel daan. Veele Straten in de Binnenstadt sünd sperrt.

So warm weer dat noch nienich

Brüssel: De verleden Sommer weer in West-Europa de warmste, sietdat dat Weer optekent ward. Na Utkunft vun den EU-Klimadeenst Copernicus leeg de Temperatur in’n Snitt twee eenhalf Graad höger as över lange Johren. Se snackt vun en starken Hittenstress. De Daten wiest ok, datt de Sommer afsünnerlich dröög weer, sodatt de Pegel vun veele Strööm un Seen düütlich daalgahn sünd.

Uni Bremen will Exellenztitel kriegen

Bonn: De Universität Bremen kiekt hüüt mit Spannung op dat Künnigmaken vun de Exellenzkommischoon. Bremen hett sik tosamen mit de Universität Ollenborg för den Exellenz-Titel anmellt. För de Hoochscholen würr dat mehr Prunk un ok mehr Fördergeld bedüden. As en Sprekersche säe, weern dat 150 Millionen Euro för de tokamen söben Johr.

Bahn maakt Streek twüschen Hannover un Berlin dicht

Hannover: En grode Bosteed twüschen Neddersassens Landshauptstadt un Berlin sett vun hüüt an maandelang den Togverkehr in Neddersassen in Schranken. Bahnen na wiet weg ward över Bruunswik un Magdeborg ümleit, sodatt de Reis tominnst 80 Minuten länger duert. Dat Generaalsaneern vun de Streek schall 14 Maanden duern.

Düütschland winnt gegen Serbien

München: De Düütsche Football Nationaalmannschaft hett dat eerste Speel mit den nee’en Bunnstrainer Jürgen Klopp wunnen. Gegen Serbien hett sik de DFB-Mannschaft mit 2 to 0 dörsetten kunnt. De Tore sünd vun Tom Bischof un Florian Wirtz schaten worrn. Tokamen Sünndag gifft dat dat tokamen Lännerspeel gegen Grekenland.

Dat Weer

Un nu en Blick op dat Weer: In Brinkum 11, in Cloppenborg 14, in Bremen un Bremerhaben 15, un in Cuxhaben sünd dat opstünns 17 Graad. Hüüt geiht dat in’t Werser-Ems-Flach deels mit Sünnschien, deels mit lockere Wulken un dröög in den Dag. In’n Oosten dorvun treckt de letzten Regenwulken bet to’n Vörmiddag över de Lünborger Heid un de Elv af, un vun de Werser her lockert de Wulken op. Vun’n Namiddag an gifft dat en fründlich un dröög Gemengsel ut Sünnschien un opstiegen Wulken bi 18 Graad op de Eilannen un 19 bet 20 Graad op dat faste Land. In de Nacht is dat locker wulkig bet klaar un dröög. Hier un dor bildt sik later Daak bi 12 bet 6 Graad. Morgen löst sik de Feller mit Daak op, denn wiest sik hier un dor de Sünn, aver ok en poor lockere oder dünne Wulken köönt dorbi ween. Vun’n Namiddag an gifft dat wedder en fründlich un dröög Gemengsel ut Sünnschien un dünne oder opstiegen Wulken bi 18 Graad op de Eilannen un 19 bet 21 Graad in’t Binnenland.

Dat weern de Narichten op platt. Tohoopstellt hett se Sebastian Segebade. Op Platt trechtmaakt un vörleest vun Marc Gelhart.