Plattdeutsche Nachrichten Plattdüütsche Narichten vun'n 25. September 2026

Bunnsdag un Bunnsraat stimmt över Tankrabatt af

Berlin: Bunnsdag un Bunnsraat stimmt hüüt över den Tankrabatt af. Plaant is, datt de Stüern üm meist 17 Cent per Liter Benzin un Diesel daalsett ward, un twars bet to dat Enn vun’t Johr. Wat dorbi an Stüern vun üm un bi 2,5 Milliarden Euro utfallt, schüllt sik Bund un Länner opdelen. Neddersassen un Bremen sünd woll nich gegen dat Gesetz, aver Bremen fordert de Bunnsregeern dorto op, vun’n Johreswessel an Direktgeld an de Börgers mööglich to maken ahn Ümweg över de Tanksteden.

Schoolkinner protesteert gegen möögliche Wehrplicht

Bremen: Schoolkinner wüllt in heel Düütschland wedder gegen dat mööglich Trüchkamen vun de Wehrplicht un de Plicht to’n Mustertwarrn op de Straten gahn. In Bremen sünd mehrere Demonstratschonen anmellt worrn, all föhrt to’n Marktplatz. Anmellt hebbt sik dorto 600 Deelnehmers. Ok in anner Städer sünd Demonstratschonen plaant, dorünner in Hannover, Hamborg un Berlin.

Wieter Maleschen op Bahnstreek Bremen – Hannover na Füer

Bremen: Op de Bahnstreek na Hannover gifft dat na en Füer jümmers noch Maleschen. Ok hüüt fohrt veele Töög Ümweeg oder fallt heel un deel ut. En poor Töög vun de RE1 un de S-Bahn schüllt hüüt aver wedder fohren. Grund för de Maleschen is en Füer bi Neestadt an’n Rübenbarg, dat ehrgüstern twee Brüchen stark ramponeert hett. De Bahnstreek dorünner is noch nich wedder heel un deel freegeven worrn.

Windkraft-Swortransport kummt vun Straat af

Nenndörp: En Swortransport mit en Flögel vun en Windrad is in’n Kreis Wittmund an’n Morgen ut den Gröönstriepen ruthaalt worrn. Middewiel is he wedder ünnerwegens. Na Angaven vun de Polizei weer dat Achterdeel vun dat Spann vun 80 Meter in de Nacht vun de Straat afkamen. Worüm dat passeert is, is noch nich klaar. Bi den Unfall is en Telefonmast tweigahn.

Fischtown Pinguins speelt gegen Wolfborg

Bremerhaben: In de Düütschen Ieshockey-Liga drapt de Fischtown Pinguins Sünndag an’n Avend in de Iesarena op de Grizzlys Wolfsborg. Dorbi mööt de Bremerhabener ahn ehren Verdeffenderer Matthew Abt utkamen. He is för dree Speelen sperrt, nadat he sik in dat Speel gegen Iserlohn nich an de Regeln hollen hett. Ok nich dorbi is de Angrieper Lenny Boos. De 19-Johrige is versehrt un fallt na Angaven vun Teammanager Sebastian Furchner för längere Tiet ut.

Dat Weer

Un nu en Blick op dat Weer: In Varel 8, in Bremen un Cloppenborg 11, in Bremerhaben 12, un in Achim sünd dat opstünns 14 Graad. Nadat sik de fröhe Daak oplöst hett, schient faken de Sünn dör lockere Wulken. Deels is de Heben bet to’n Namiddag ahn Wulken. Regen gifft dat gor nich. Op de Eilannen kladdert dat Thermometer op 17 bet 18 Graad, op dat Fastland op 19 bet 21 Graad. In de Nacht is de Heben eerst klaar, blots an de Noordsee wiest sik eerste Wulken. De breedt sik bet na Bremen un ümto ut. N’beten Regen gifft dat aver hööchstens an’n Morgen in Oostfreesland. Dorto 14 Graad op de Eilannen un 11 bet 5 Graad in’t Binnenland. Morgen is dat twüschen Steenhuder Meer un Lünborger Heid eerst noch fründlich un dröög, anners breedt sik de dichten Wulken wieter ut un bringt ok enkelte Schuers. Vun Middag an lockert dat vun de Noordsee her wedder op mit veel Sünnschien. An de Küst gifft dat 17 Graad, in’t Binnenland 18 bet 21 Graad. An’n Sünndag eerst hier un dor wulkig, later gifft dat en Mix ut Sünn un lockere oder dünne Wulken bi 18 bet 24 Graad.

Dat weern de Narichten op platt. Tohoopstellt hett se Gabriele Intemann. Op Platt trechtmaakt un vörleest vun Marc Gelhart.