Plattdeutsche Nachrichten Plattdüütsche Narichten vun'n 16. September 2024

Sekerheitsbehörden stellt Mann wegen versöökten Anslag op Trump

Washington – Na den woll versöökten Anslag op Ex-US-Präsident Donald Trump hebbt de Sekerheitsbehörden een Mann faatnahmen, de dar woll achter stickt. Dat schall een 58-Jöhriger ut den US-Bunnesstaat Carolina sien, de toletzt na Hawaii trocken weer. Dat vermellt de „New York Times“ un beroopt sik op de Polizei. Güstern harrn Wachlüüd vun Trump op een Mann, de Wapen bi sick harr, schaten. He harr sik bi Trumps Golfplatz in de Büsche versteekt.

Hoochwaterlaag in Europa wieter keddelig

Prag – De Hoochwaterlaag in Deelen vun Middel- un Osteuropa is wieter keddelig. In Polen, Tschechien un Rumänien sünd heele Flachs un Dörps ünner Water. Tohoopnahmen sünd bitnu tominnst 11 Minschen sturven. In Österriek kladdert dat Water in de Strooms jümmer wieter an. In Polen is een Staudamm broken. In Tschechien ward noch veer Lüüd misst. Een paar Strooms hebbt Pegelstänne as toletzt vör hunnert Johren.

Dütschland fangt mit Kuntrullen an de Grenz an

Berlin – In Dütschland gifft dat siet Middernacht wedder Kuntrullen an de West- un Nordgrenz. Neddersassen un Nordrhein-Westfalen hebbt mit de Kuntrullen op Tied an de Grenz to Belgien un den Nedderlannen anfungen. In’n Loop vun’n Dag schüllt denn ok Lüüd, de ut Luxemborg or Dänemark inreist, mal hier mal dar överprööft weern. De tosättlich Kuntrullen löppt erstmal söß Maand.

Metall- un Elektroindustrie snackt över de Tarife

Hamborg – In de Stadt fangt hüüt dat Snacken över de Tarife för de norddütsche Metall- un Elektroindustrie an. Darvun bedrapen sünd rund 138-dusend Arbeiders, ok in Bremen un West-Neddersassen. Vör Beginn vun dat Drepen is vör goot een Stünn in Hamborg een Demonstratschon losgahn, to de woll rund eendusend Lüüd kamt. De IG-Metall foddert bi een Looptiet vun de Tarife vun twolf Maand söben Perzent mehr Geld. Streiks to’n Wahrschaun sünd erst vun’n Enn vun’n Oktober an verlöövt.

BSW Lannesverband in Neddersassen un Bremen gegrünnt

Hannober – Dat Bündnis Sahra Wagenknecht hett nu ok in Neddersassen een Lannesverband. He is güstern in Ollenborg grünnt worrn. As Vörsitter hebbt de BSW-Littmaten den Doktor Thorsten Renken un den Politikwetenschuppler un Projektmanager Holger Onken wählt. In Bremen harr sik an’n Sünnabend een Lannesverband vun’t BSW opstellt.

Dat Weer

Un nu een Blick op dat Weer: in Bremerhaben un Deefholt 16, op Wangerooge 17 un in Bremen sünd dat opstunns 18 Graad. Vundaag verdeckt jümmer wedder dicke Wulken de Sünn un in’n Loop vun’n Dag is vör allens twüschen Ems un Werser jümmer mal mit een Schuer to reken. Wenn dat dröög un fründlich is, ward dat 18 bit 20 Graad warm. Tokamen Nacht ward dat erst klaar bit locker wulkig, later kummt hoger Nevel op un dat is meist dröög. Dat Thermometer sackt op 15 bit 10 Graad. Morrn to’n Deel erst noch gries un dakig, denn ward dat mehr un mehr fründlich un Sünn un lockere Wulken wesselt sik af – bi 18 bit 19 Graad op de Eilanden un 21 bit 22 Graad in’t Binnenland. Middeweken na Nevel fründlich bi bit to 24 Graad. Dat weern de Narichten op Platt. Katrin Martens hett se tohoopstellt. Op platt trechtmaakt un vörleest hett se Heidi Jürgens.