Plattdeutsche Nachrichten Plattdüütsche Narichten vun'n 12. September 2024

Alarmsystemen warrt in ganz Düütschland test

Bonn: Dat Bunnsamt för Bevölkerungsschutz löst testwies to´n veerten Mal in ganz Düütschland Klock ölven de Alarmsystemen ut. Dor warrt ünner annern Wohrschaunarichten op de Mobiltelefone schickt, man ok Dörsaag in Radio un Fernsehen warrt dat geven. Bi düssen Proovalarm kamen ok Sirenen to´n Insatt. Dormit schall kloor ween, of all Minschen in en Katastrophenfall tofaatkriegen warrt.

Na Deel-Instöört vun en Brüch warrt mehr Investitschoon verlangt

Berlin: Dat Tohoopfallen vun de Carolabrüch in Dresden soorgt för mehr Rööp na en Investitschoonsoffensiev. De Düütsche Städer- un Gemeenbund verlangt, de Infrastruktur alltohoop starker to maaken. He verwiest op en Studie, in de rund 60.000 düütsche Brüchen in kommunale Hand ünnersöcht wurrn. Meist de Halve vun den Brüchen weren dorna in kien gooden Tostant, heet dat. Woso de Brüch in Dresden tohoopfullen is, is noch nich kloor.

Raststeeden-Test vun den ADAC: Lucht un Schadden

München: De ADAC hett veertig gröttere Raststeeden an düütschen Autobahnen, wieldess de Hööftreistiet verleden Weken, test. Jedeen föfte wurr as „goot“ weert, „bannig goot“ weer kien. Alltohoop söss Anlaagen weren „slecht“. Test wurrn ünner annern dat Anbott vun Gastronomie un de Priesen, bavento de Tostand vun de Tolettanlagen. Veel Anbotten in Tanksteeden-Laadens weren to düer, heet dat in den Testbericht.

Bremen: Minner Intress an Warmspumpen bet nu

Bremen: In Bremen un Neddersassen bruuken bet nu in Vergliek minner Minschen en Warmspumpen, heet dat in den Bericht vun de staatlich KfW-Bank. Dorna hebbt meist söss Perzent vun de düütschen Huusholten totiets en Warmspumpen installeert. In Bremen sünd dat dorgegen blots twee, in Neddersassen veer Perzent. Na een Ümfraag is aver jedeen drütte Huus- or Wahnungseegner in Bremen reinweg an en Inbo vun socke Anlagen interesseert, in Neddersassen sünd dat na de KfW-Bank sogor jedeen Tweete.

Töven op Problemen bi Togverkehr twuschen Bremen un Bremerhoben

Bremen: Vun hüüt af an is de reginale Togverkehr twuschen Bremen un Bremerhoben-Lehe, vunwegen Boarbeiden, för en poor Daag inschränkt. En Reeg Töög vun de Regio-S-Bahn 2 fallen ut – un twaars in den Avendstünn un fröh an morgen. As Behölp föhrn Bussen. Dat ganze duert wohrschienlich bet Sünndag.

Dat Weer

Un nu kiekt wi op dat Weer: In Möppen hebbt wi acht Graad, in Bremen un Bremerhoben negen Graad un in Emm hebbt wi opstunns teihn Graad. De Dag fangt mit Sünnenschien un Wulken an, an de Küst kann dat Regen geven. An Namiddag schuert dat denn hier un dor ok in´t Binnenland. Enkelte Gewidder sünd ok dorbi un dat denn bi 14 bet 16 Graad. In de Nacht sünd mal mehr mal weniger Wulken an Heven, meist blifft dat in´t Binnenland dröög. An de Küst un op de Eilannen sünd aver Schuer un Gewidder ünnerwegens. Dat Thermometer wiest us 12 bet 11 Graad op de Eilannen un negen bet fief Graad in´t Binnenland. Freedag wesseln sik Sünn un Wulken wedder af, man an de Küst un üm de Werser ümto kann dat wedder Schuers geven un dat bi 15 bet 17 Graad.

Dat weren de Plattdüütschen Narichten. Tohoopstellt vun Michael Kück. Op Platt trechtmaakt un vörleest vun Martina Brünjes.