Plattdeutsche Nachrichten Plattdüütsche Narichten vun'n 23. August 2024

Harris is nu amtlich Präsidentschuppskandidatin

Chicago – In den USA is Kamela Harris nu ok amtlich de Präsidentschuppskandidatin vun de Demokraten. Op de ehr Parteidag in Chicago hett Harris annahmen, dat se op de List sett ward. In ehr Reed hett se klaar maakt, dat se Präsidentin för all Amerikaner weern un dat Land wedder tohoopföhren will. Harris hett sik to de Nato bekannt un „Jo“ to dat Ünnerstützen vun de Ukraine seggt. Buterdem hett se vör ehrn Wedderpart Donald Trump wahrschaut.

: Nee’et Verhanneln to Wapenroh in Nahoost

Kairo – In de ägyptische Hauptstadt löppt nee’e Verhannlungen över een Wapenroh in’n Gazastriepen. Isreal hett Vertreder vun’n Geheemdeenst na Kairo schickt. Dar is woll ok een amerikansche Afordnung darbi, vermellt Medien. Bi dat Snacken geiht dat blangen de Wapenroh üm dat Uttuuschen vun israelisch Geiseln gegen palästinensche Häftlinge.

Solarstroom op nee’en Hööchststand

Berlin – In Dütschland is in’n Juli so veel Solarstroom produzeert worrn as noch nienich in een Maand. Tohoopnahmen weern dat 10 Terawatt-Stunnen west, sä Bunneswertschuppsminister Robert Habeck. Dat weer een Plus, obschoons de Sünn weniger schient hett as in’t verleden Johr. De Utboo vun de Solarstroom-Produktschon in Dütschland harr toletzt dütlich an Fohrt opnahmen.

Bremerhaben schall 20 Millionen Euro in’t Johr inspoorn

Bremen – De Stadt Bremerhaben schall vun’t nöchste Johr an 20 Millionen Euro elkeen Johr inspaarn. Dat foddert dat Finanzressort vun’t Land Bremen in een Breef, de buten un binnen vörliggt. Dat Ressort meent, dat de Stadt vör allens bi Sotschalgellern un bi’t Personaal spaarn mutt - dar gifft Bremerhaben in’n Vergliek mit de Stadt Bremen dütlich mehr ut.

Truerfier för Willi Lemke in’n Bremer Dom

Bremen – In’n Bremer Dom fangt glieks de öffentlich Truerfier för den ehemalig Senator un Werder Bremen Manager Willi Lemke an. He weer verleden Week mit 77 Johren sturven. To de Truerfier rekent se mit velen bekannten Lüüd. Se ward för all, de in’n Dom keen Platz mehr kriegt, op een Grootbildschirm överdragen. To sehn is de Truerfier ok live in’t Radio Bremen Fernsehen un in’t Internet op butenunbinnen.de.

Dat Weer

Un nu een Blick op dat Weer: op Wangerooge 20, in Bremen, Bremerhaben un Deefholt sünd dat opstunns 21 Graad. Na een meist drögen Vörmiddag un Middag mit een beten Sünn kummt vun de Waterkant her dicke Wulken mit Regenschuers op. Later an’n Namiddag un an’n Abend lockert dat vun de Küst her wedder op, man dat schuert wieter jümmer mal, bi 21 bit 26 Graad. Tokamen Nacht treckt letzte verenkelte Schuers över’t Land, darachter lockert dat op un dat is dröög. Dat Thermometer sackt op 17 bit 12 Graad. Morrn hebbt wi een Mix ut Sünn un Wulken. In’t Emsland un Oostfreesland treckt an’n Vörmiddag dicke Wulken dör, de ok mal een beten Regen bringt. Later an’n Abend kummt denn vun de Ems her Schuers un Grummelschuers op. Dat ward kort mal dütlich wärmer bi 26 bit 30 Graad, an de Küst bi 24 Graad. Dat weern de Narichten op Platt. Irene Lottes hett se tohoopstellt. Op platt trechtmaakt un vörleest hett se Heidi Jürgens.