Plattdeutsche Nachrichten Plattdüütsche Narichten vun'n 22. August 2024

Bunnskanzler Scholz bi Bedriefsversammeln op de Meyer-Warft mit bi

Papenborg: Bunnskanzler Olaf Scholz un de Ministerpräsident vun Neddersassen, Stephan Weil, sünd an’n Middag bi en Bedriefsversammeln op de Meyer-Warft mit bi. De Meyer-Warft is dat Geld utgahn. Scholz warrt nu woll anseggen, dat de Bund un dat Land Neddersassen för en faste Tiet mit mehrere Hunnert Millionen Euro bi den Familienbedrief instiegt. Achteran steiht en Presskunferenz an. Bi de Meyer-Warft arbeidt opstunns 3300 Lüüd.

De Düütsche Buernverband: Flaue Oornt

Berlin: De Düütsche Buernverband hett seggt: Unner’n Streek weer de Oornt düt Johr nich goot lopen. Se harrn weniger infohrt as in de Johren vörher, meen Buernpräsident Joachim Rukwied in’t ZDF. Dat geiht also wieder bargdaal. Siet teihn Johr bringt de Buern weniger Koorn un Raps in. Un wat se inbringt, döggt jümmers weniger. Dat hangt tohoop mit den Klimawannel un mit dat, wat de Politik vörgeven deit. In enige Gegenden dröffen de Buern nich mehr noog Dünger streien. Dat dat Eten dürer warrt, dor rekent Rukwied nich mit.

Vun hüüt op an: Ne’e Regeln för Cannabis an’t Stüer

Berlin: För‘t Autofohren gellt vun hüüt op an ne’e Regeln för Cannabis an’t Stüer. So liggt bi dat Middel THC de böverste Weert bi 3,5 Nanogramm op jeden Milliliter Bloot. Fachlüüd seggt: Dat bedüdt sowat as 0,2 Promill Alkohol in’t Bloot. De dat nich inhollt, mutt mit 500 Euro Straafgeld reken un dröff een Maand lang keen Auto fohren. De bavento ok noch Alkohol drinkt, kann mit 1000 Euro Straafgeld reken.

Huusholt op Stopp: Bremer Schoolmesters gaht op de Straat

Bremen: Wo de Huusholt in’t Breemsche Bildungsressort op Stopp sett worrn is, will de Gewarkschap Erziehung un Wetenschap dorgegen in de Bremer Binnenstadt op de Straat gahn. Klock 4 wüllt se sik versammeln. De GEW verlangt: De Schuldenbrems schall eerstmal nich mehr gellen, un överhaupt schall de Bund mehr Geld för Bildung geven. In’n Juli-Maand harr de Behöörd den Huusholt op Stopp sett, anners harrn se womööglich gor nix mehr betahlen kunnt.

Klinikum Willemshaven schall mit Frieslandkliniken tohoopgahn

Willemshaven: De Raat vun de Stadt hett güstern Avend noch mal wedder en Toschuss för dat städtische Klinikum fastleggt. Bet to’t End vun’t Johr schall dat Krankenhuus noch mal 13,5 Millionen Euro kriegen, dat dat nich Bankrott geiht. In de verleden twee Johr harr dat Stadt al en poor mal mit Geld utholpen – bet nu sünd dat meist 60 Millionen Euro. Op mittlere Sicht schall dat Klinikum Willemshaven mit de Friesland-Kliniken Sande un Varel tohoopgahn. Dor hett de Kreisdag in Friesland güstern Avend ja to seggt.

Dat Weer

Un woans süht dat mit dat Weer umto ut? Opstunns hebbt wi in Bremervöör 14 Graad, in Bremen un Bremerhaven sünd dat 15 un in Deefholt 16 Graad. Vundaag: Eerst vele Wulken, man süüdlich vun Bremen kriegt wi ok de Sünn to sehn. An’n Middag un Namiddag lockert dat in’t Binnenland för en Tietlang op. Gegen Avend aver treckt vun de See her wedder mehr Wulken op. Dröög, blots an de See kann dat ok mal pladdern. Dat Thermometer krabbelt op 20 Graad op de Inseln, anners 21 bet 23 Graad. De Wind dorto weiht in Maten, an de See ok frisch, vun de süüdwesten Kant. An de Küst ok mit deegte Böen. Tokamen Nacht: Vele Wulken, aver doch dröög. En beten druppeln kann dat na de Oostfreeschen Inseln to. Bi 18 bet 16 Graad. Morgen: Eerst dröög mit en beten Sunnschien. Denn aver kaamt vun de See dichte Wulken rin, un dat fangt an to pladdern. An’n Avend lockert dat wedder en beten op. Dat Ganze bi 21 bet 25 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Gabriele Intemann.