Plattdeutsche Nachrichten Plattdüütsche Narichten vun'n 21. August 2024

Kamala Harris op Parteidag as Präsidenten-Kandidatin opstellt

Chicago: De Demokraten in de USA hebbt bi jemehren Parteidag noch mal wedder seggt: Kamala Harris is bi de Wahl in’n November Kandidatin för dat Präsidenten-Amt. Egens keem dat dor gor nich mehr op an, wo se doch vörher al bi en Internet-Afstimmen opstellt worrn weer. Bi sien Reed op de Versammeln weer de fröhere US-Präsident Barack Obama mit den Kandidaat vun de Republikaners Donald Trump böös in’t Gericht gahn. He weer ünnerwegens mit dördreihte Komplott-Geschichten, meen Obama.

US-Butenminister Blinken will wieder verhanneln

Tel Aviv: US-Butenminister Antony Blinken will jümmers noch, dat op Duer in’t Gaza-Land nich mehr schaten warrt. Eerst harr he in Israel verhannelt, achteran weer he na Ägypten un Katar reist. Jüst as de USA speelt de beiden Staaten den Middelsmann twüschen Israel un de Hamas. Bet nu is dor aver nix bix rutsuert. Israel un de Hamas smiet sik vör, de anner will överhaupt keen Freden.

Bedregeree in dat Bremer Amt för Soziale Deenste – Staatsanwaltschap övernimmt

Bremen: De Staatsanwaltschap hett en Fall bi dat Amt för Soziale Deenste an sik nahmen. Seggt warrt: Twee Lüüd dor hebbt bedragen. So steiht dat in den Werser-Kurier. En Mann un en Fro hebbt woll siet twee-en-half Johr Geld vun de Behöörd op egen Konten överwiest. Dat geiht um sowat 418.000 Euro. De Staatsafkateree smitt jem vör: Se hebbt Vörschuss op Unnerhalt falsch opsett un dorbi Paperen vun Lüüd anleggt, de dat gor nich geven deit. Un för de schullen denn Konten inricht warrn. De Bremer Staatsafkateree seggt: Se unnersöökt 31 Saken.

Breemsche Börgerschap snackt över Straaf-Delikten mit Metzen

Bremen: In de Breemsche Börgerschap snackt se opstunns över Straaf-Delikten mit Metzen. De CDU harr en Andrag för en Aktuelle Stunn stellt. Wat dor achter stickt: In de verleden Johren sünd düsse Delikten mehr un mehr worrn. De CDU verlangt dorum: De Gegenden in Bremen, in de nüms Waffen dregen dröfft, schüllt grötter warrn.

Minschen mit över 65 köönt in Düütschland gau arm warrn

Berlin: Meist een Minsch vun fief, de öller is as 65, kunn in Düütschland arm warrn. Dat steiht in en Antwoort vun de Bunnsregerung op en Anfraag vun de Linken. In Düütschland leevt um un bi 20 Millionen Rentner. Mehr as 18 Perzent vun de kunnen in’t Öller licht arm warrn. De Bunnsregerung seggt ok: In de verleden teihn Johr is düsse Weert um sowat elven Perzent anstegen.

Dat Weer

Un woans süht dat mit dat Weer umto ut? Opstunns hebbt wi in Bremen, Achem un Ollenborg 16 Graad, in Bremerhaven sünd dat 17 Graad. Vundaag gifft dat en Hen un Her mit Sunnschien un opstiegen Wulken. Af un an treckt en Schuer vörbi, an de See pladdert dat ok wat duller, mag ween mit Blitz un Dunnerslag. Vun dat Emsland över dat Ollenborger Mönsterland bet na de Aller hen blifft dat faken dröög. Dat Thermometer krabbelt op blots noch 18 Graad op de Inseln, anners 19 bet 21 Graad. De Wind dorto weiht in Maten oder en beten mehr vun de süüdwesten bet westen Kant. Op de Inseln ok deegt un mit störmsche Böen. Tokamen Nacht: Mal mehr, mal weniger Wulken. De sammelt sik an de Küst, warrt aver ok dor weniger. Bi 16 bet 11 Graad. Morgen: Eerst vele Wulken. In’t Binnenland lockert dat denn aver gau op, un wi kriegt de Sunn to sehn. Langs de Küst mehr Wulken, man dröög blifft dat ok hier. Dat Ganze bi 21 bet 24 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Michael Kück.