Plattdeutsche Nachrichten Plattdüütsche Narichten vun'n 20. August 2024

Bunnskanzler Scholz rüümt Probleme in de Koalition in

Bremen: Bunnskanzler Olaf Scholz hett de Ampelkoalition opropen mehr tosamen to arbeiden. Wichtig is nu dat man good regiert un sik good benimmt. Dat seggt he bi een Börgerdialog in Bremen. De Koalition, na de Wahl, so optostellen is schon nich so eenfach wesen, un dat is nu ok noch so, seggt he. Dat Fastleggen vun den Huusholt is ok nich eenfach wesen, und dat spöört man noch in de Bilanz vun de Leistungen vun de Regierung. Grönen-Boss Omid Nouripour harr tolest de Ampel as „Övergangskoalition“ betekent.

Kandidatin för US Präsidentenwahl Harris dankt Joe Biden

Washington: Mit een Visit vun Kamala Harris, wo keeneen mit rekent hett, hett de Parteidag vun de US-Demokaten anfungen. In ehre Reed hett se Präsident Joe Biden dankt und de Deligierten opropen sik mit alle Kraft för dat Witte Huus stark to maken. Biden hett de Präsisentenwahl, de vör de Döör steiht, in siene Reed as dat fechten üm de Demokratie betekent.

Blinken sett sik för Vörslag in, dat dat Scheten ophöört

Tel Aviv: US-Butenminister Anthony Blinken hett de islam`sche Hamas opropen, den letzen Vörslag dorför, dat dat Scheten in´t Gazastriepen ophöört, totostimmen. Na dat Snacken mit Israels Premier Benjamin Netanjahu hett Blinken seggt, dat he „Ja“ to den Vörslag seggt hett. Vertreder vun de Hamas traut de Saak nich. Blinken will nu in Kairo mit de Regeerungs-Bosse vun Ägypten un Katar snacken. Dat sünd de annneren Vermittler in´t Nahoost-Striet.

Krankenstand bi Kita-Anstellte besünners hoch

Gütersloh: Kita-Anstellte sünd as dat schient fakener krank as de Snitt vun annere Berufskoppel. Dat wiest een Studie vun de Bertelsmann-Stiftung. Dorna sünd Anstellte bi dat Oppassen för Kinner un bi dat Grootmaken vun Kinner in´t verleden Johr in´t Snitt an knapp 30 Dagen krank wesen. In all de anneren Berufe sünd dat rund 10 Dage minner wesen.

Naklapp för Raketenprojekt mit Bremer mitmaken

Bremen: De Firma Rocket Factory Augsburg, de Raketen boet, un bi de ok de Bremer Ruumfohrtkonzern OHB mitmaakt, hett bi een Projekt en böösen Slag in´t Kontoor kregen. Eene nee utklamüüsterte lütt Rakeet is gistern Avend bi een Teststart op de Shetland Eilannen explodeert. De eerste Floog schull egentlich in dütt Johr noch stattfinnen. Nu mutt man eerst noch rutfinnen worüm dat paseert is.

Dat Weer

Un nu een Blick op dat Weer: in Defhold 14, in Ollebborg, in Bremen un in Bremerhaben sünd dat opstünns 15 Graad. Hütt hebbt wie eerst blots een paar luckere Wulkenfeller an´t Heben un de Sünn schient för us. Hütt Nomdag treckt denn vun de Nordsee her Wulken op , de in´t Emsland un Oostfreesland Schuers mit sik bringt. Dat kann ok mal düchtig pladdern, bi 25 bit 28 Graad. Tokamen Nacht treckt dicke Wulkenfeller mit Schuers un Gewidder  vun Westen na Oosten dör. Hier un dor kann dat ok mal för twee, dree Stünnen Regen geven, bi 16 bit 13 Graad. Morrn wesselt sik de Sünn un de dicken Wulken af. Dat kann ok mal Schuers geven. An de Küst kummt ok veel Natt vun baven rünner, hier un dor ok mit Blitz un Dunnerslag. De Temperaturen liggt bi 18 bit 22 Graad. Dunnersdag schient in´t Binnenland meist de Sünn, bi 21 bit 25 Graad. Dat weren de Narichten op Platt. Tohoopstellt hett seIrene Lottes. Trechtmaakt un vörleest vun Antje Kruppa.