Plattdeutsche Nachrichten Plattdüütsche Narichten vun'n 19. August 2024

Blinken dröppt sik mit Netanjahu

Tel Aviv: US-Butenminister Blinken is na Israel reist un dröppt sik opstünns mit Regerungsbaas Netanjahu. Bi dat Drapen will sik Blinken dorför insetten, datt dat Scheten in’n Gaza-Krieg ophöört. Wieldess hett de radikaal-islaamsche Hamas den nee’esten Plaan för de Wapenroh in’n Gazastriepen kritiseert, jüst so as dat Freelaten vun de israeelschen Geiseln.

Nouripour betekent Ampel as Utloopmodell

Berlin: Grönenbaas Nouripour süht in de Ampelkoalitschoon en Utloopmodell. He will twars för de Tokunft nix utsluten, as he in dat ARD-Sommerinterview säe. Aver na sien Menen is opstünns tosamen mit FDP un SPD düütlich, datt dat Vertroen bilütten upbrukt is. Na de Tiet vun Merkel is de Ampel as Regerung för‘n Övergang nödig ween, aver tofreden is he dormit nich.

Bunnskanzler in Vechte un Bremen to Gast

Vechte: Bunnskanzler Scholz hollt glieks üm Klock ölben de Festreed op den Stoppelmarkt in Vechte. He is na Angaven vun de Stadt de eerste Bunnskanzler, de düsse Reed hollt. Darna fohrt he na Bremen. Tosamen mit Börgermeister Bovenschulte un Binnensenater Mäurer will he bi de Inbörgerungsfier in’t Raathuus de nee’en Börgerslüüd graleern. Bavento will he sik avends mit de Lüüd uttuuschen.

Tall vun Balkonkraftwarken in Bremen hett sik verduppelt

Bremen: In’t Land Bremen sünd middewiel mehr as duppelt so veel Balkonkraftwarken anmellt as to’n Johreswessel. Alleen in Bremen sünd bet Mitt August offiziell mehr as 1400 nee’e Stecker-Solaranlagen an’t Nett gahn, in Bremerhaben weern dat 270. Dat starke Anstiegen liggt na Utkunft vun’n Nettbedriever swb an’n Solarpakt 1 vun de Bunnsregeern.

Maritime Daag geht in Bremerhaben to Enn

Bremerhaben: De Maritimen Daag in Bremerhaben sünd nu vörbi un hebbt wedder för en Floot vun Besökers sorgt. Meist 420.000 Minschen weern dor. Besünners veel Besökers geev dat an’n Freedagnamiddag un Sünnavend. De Veranstalters sünd all tohoop tofreden.

Dat Weer

Un nu en Blick op dat Weer: In Leer 14, in Bremen 16, in Cloppenborg 17 un in Bremerhaben sünd dat opstünns 18 Graad. Hüüt gifft dat en Wessel ut Sünnschien un lockere bet dickere opstiegen Wulken, un dat blifft dröög. An de Noordsee schient de Sünn all tohoop an’n längsten mit meist teihn Stünnen. In de Avendstünnen löst sik de mehrsten Wulken ok in’t Binnenland op. De Temperaturen liggt bi 21 bet 24 Graad. In de Nacht funkelt meisttiets de Steerns an’n Heben. In de Fröh treckt vun Oostfreesland un dat Emsland her’n poor lockere oder dünne Wulken op, de aver keen Regen bringt. Dat Thermometer sackt daal op 17 bet 10 Graad. Morgen schient blangen lockere oder dünne Wulkenfeller för lange Tied de Sünn. An’n Namiddag ward dat vun de Nedderlannen un de Noordsee her wulkiger. Besünners an’n Avend gifft dat twüschen Ems un Werser Regen, to’n Deel ok deegt un mit Gewidder. Tovör ward dat sommerlich warm bi 24 bet 28 Graad.

Dat weern de Narichten op platt. Tohoopstellt hett se Katrin Martens. Op Platt trechtmaakt un vörleest vun Marc Gelhart.