Plattdeutsche Nachrichten Plattdüütsche Narichten vun'n 9. April 2025

CDU, CSU und SPD kamen bi Koalitschonsverdrag övereen

Berlin. De Koalitschonsverhanneln twüschen Union und SPD stahn as dat lett kört vör de Zielstreek. Vertreder vun de dree Parteien sünd an´n Morgen womööglich to de letzte Verhannelnsrunn tosamenkamen. An´n Avend harrn se na rund darthein Stünnen Beraden eerstmal en Paus makt. Ut de Verhannelnsrunn weer achteran to hören, dat man bit hüüt Middag övereens kamen will. Dor weer al en Pressekonferenz för den Namiddag ankünnigt.

USA leggt neje Töll fast

Washington. Af vundag gellen in de USA noch mehr Töll. Ünner annern op Woren ut de Europäisch Union. De Extra-Töll liggen bi twintig Perzent. Op Woren ut China kamen in den USA siet vundag Töll in Hööchde vun 104 Perzent. China harr vörher en Frist vun de USA, üm de chinesisch Töll wedder vun´n Disch to nehmen, verstrieken laten.

Schoolen in Bremen schüllt Förderangebotten sülfst stüern

Bremen. Öllern vun Grundschölers mit Hölp, wenn´t nödig deit, mööt den Hölpsdeenst in Bremen in Tokunft nich mehr extra beandragen. Dorför föhrt de Stadt de, as de nöömt warrt, „systemisch Schoolbegleiten“ in. Dat Plaan-Papeer vun Bremen süht vör, dat de Grundscholen de nödigen Förderlüüd, wenn´t nödig deit, sülfst todelen. De Kosten för dat Johr liggen bi rund 3,8 Millionen Euro.

Fischfangflott schall lütter weern

Bremerhaben. Üm de düütsche Fischeree fit för de Tokunft to maken, mööt ole Fischfangscheep afwrackt un de Flott lütter makt weern. Bavento mööt ok de Fischkutters vun de Energie beter konstrueert weern. Dat steiht in den Bericht vun de „Tokunftskommischon Fischeree“, den dat Bunnsministerium för Landbo vörleggen hett. So schall de düütsche Fischfangflott alltohoop lütter weern. In de Krabbenfischeree miteens üm een Drüttel. Üm wedder mehr Fangflachen op dat Meer praat to stellen, schüllt Fischeree, Angeln un Waterkulturen in Tokunft ok in Offshore-Windparks möglich ween.

IQ af 130: Besunners klooke Minschen drapen sick

Bremen. De Liddmaten vun den Vereen för besunners klooke Minschen „Mensa“ kamen in Ogenblick in Bremen to ehr Johrsdrapen tosamen. Bit Sünndag rekent de Organisatschoons-Trupp mit rund 1.200 Lüüd ut ganz Düütschland, de dor herkummt. Wokeen Liddmaat bi „Mensa“ weern mag, mutt en Klookheitsquotschent vun tominnst 130 vörwiesen.

Dat Weer

Un nu noch en Blick op dat Weer: In Dörben veer, Bremen-Mitt söss, in Bremerhaben acht un in Nienborg sünd dat opstunns dree Graad. Vundag is dat  an de Nordsee mehr gries. De Daak in de hoge Luft will dor nich weg. In´t Binnenland stellt sick na en griesen Anfang en Mischmasch ut Sünnschien un Wulken in. An´n Avend kriegen de Hoochnevel-Feller de böverste Hand. De Wind weiht en beten. An de Küst in Maten vun de noorden bit noordwesten Kant. De Temperaturen liggen bi acht bit darthein Graad. In de Nacht gifft dat dichte Daak in de hoge Luft mit velen Wulken. Man dat blifft dröög. In Richt Elv rieten de Wulken op. Dree bit söven Graad stahn denn op dat Thermometer. Morn gifft dat an de Nordsee mehr Wulken, man dat blifft dröög. In´t Binnenland fangt dat gries an un to´n Namiddag schient den faken de Sünn. Dat Thermometer wiest thein bit foffthein Graad.

Dat weern de Narichten op platt. Tohoopstellt hett se Sven Kuhn. Op Platt trechtmaakt un vörleest vun Markus Weise.